11
Aug
愛情唔可靠，一紙婚書係咪至死不渝嘅承諾呢？福州兩大婚俗文化收藏家借出近百件由晚清至中共建政初期婚書、婚照同喜帖，即日起至20日喺中港城舉行《中國婚俗婚書》展覽。八方噚日先睹為快，展品當中以一張道光三十三年結婚證書歷史最悠久，上面寫有「螽斯衍慶」四個字，寓意子孫滿堂，繁衍不絕。 收藏家洪偉收集婚書11年，藏品多達300件。佢話清朝仍係盲婚啞嫁，所以婚書只有雙方家長名字，直至民國時期，社會開始接受自由戀愛，婚書先出現新郎新娘嘅名。 收藏家不會割愛眾多收藏品中，佢形容一張晚清時期嘅童養媳婚帖係「婚書中的珍品」，貼有中國首批自行印製嘅「印花稅票」，證明婚姻得到官方承認。張帖雖然爛蓉蓉，但市值已由人民幣3000元升至逾萬元。洪偉堅稱不會割愛：「所有收藏好比我的孩子，絕對不會賣出去！」 五十年代開始，內地禁止童養媳買賣，當年一位老太太因為當兵兒子多年來音訊全無生死未卜，於是寫下「解放童養媳志願書」，讓23歲嘅童養媳回復自由身，反映中國女性地位逐漸崛起。
